តាកែវ ៖ នៅព្រឹកថ្ងៃព្រហស្បតិ៍ ទី២២ ខែតុលា ឆ្នាំ២០២៦ នៅសាលប្រជុំធំស្នងការដ្ឋាននគរបាលខេត្ត លោកឧត្តមសេនីយ៍ទោ ម៉ែន លី ស្នងការនៃស្នងការដ្ឋាននគរបាលខេត្តតាកែវ បានអញ្ជើញដឹកនាំកិច្ចប្រជុំបូកសរុបសភាពការណ៍ និងលទ្ធផលកិច្ចប្រតិបត្តិការប្រចាំខែតុលា ព្រមទាំងលើកទិសដៅការងារបន្តសម្រាប់ខែវិច្ឆិកា ឆ្នាំ២០២៦ និងការត្រៀមរៀបចំផែនការកម្លាំងការពារសន្តិសុខ សណ្ដាប់ធ្នាប់ តាមការិយាល័យបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៦ ឆ្នាំ២០២៧ ខាងមុខ។
ពិធីនេះមានការអញ្ជើញចូលរួមពី លោក-លោកស្រីស្នងការរងទាំងអស់, លោកនាយការិយាល័យជំនាញទាំង៣៣, លោក-លោកស្រីនាយរងការិយាល័យ, នាយផ្នែក, លោកអធិការ និងអធិការរងទទួលការងារសេនាធិការ ព្រហ្មទណ្ឌ សន្តិសុខ អន្តោប្រវេសន៍ សណ្ដាប់ធ្នាប់ គ្រឿងញៀន អត្តសញ្ញាណប័ណ្ណ និងកិច្ចការប៉ុស្តិ៍ នៃអធិការដ្ឋាននគរបាលក្រុង-ស្រុកទាំង១០, លោកនាយប៉ុស្តិ៍នគរបាលរដ្ឋបាលឃុំ-សង្កាត់ទាំង១០០, លោកមេបញ្ជាការ មេបញ្ជាការរងវរសេនាតូចការពារព្រំដែនគោកលេខ៦០៣, លោកនាយប៉ុស្តិ៍នគរបាលការពារព្រំដែន, លោកនាយប៉ុស្តិ៍ច្រកទ្វារទ្វេភាគីកំពង់ក្រសាំង ព្រមទាំងមន្ត្រីនគរបាលពាក់ព័ន្ធជាច្រើនរូបទៀត។
លោកឧត្តមសេនីយ៍ទោ ម៉ែន លី បានថ្លែងកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់កងកម្លាំងនគរបាលទូទាំងខេត្ត ដែលបានបំពេញភារកិច្ចការពារសន្តិសុខ ស្ថិរភាពនយោបាយ និងសណ្ដាប់ធ្នាប់សង្គមបានយ៉ាងល្អប្រសើរក្នុងខែកន្លងមក។ ជាមួយគ្នានោះ លោកស្នងការបានផ្តល់អនុសាសន៍ និងដាក់ចេញនូវបទបញ្ជាយ៉ាងម៉ឺងម៉ាត់ដល់លោកអធិការក្រុង-ស្រុក និងកងកម្លាំងទាំងអស់ ដូចខាងក្រោម៖
១. ការងារត្រៀមការពារការបោះឆ្នោត៖ លោកអធិការក្រុង-ស្រុកទាំងអស់ ត្រូវសហការជាមួយអាជ្ញាធរដែនដី និងគណៈកម្មការរៀបចំការបោះឆ្នោត ចុះពិនិត្យ និងស្រង់ស្ថិតិទីតាំងការិយាល័យបោះឆ្នោតឱ្យបានច្បាស់លាស់ ដើម្បីរៀបចំផែនការកម្លាំងឈរជើងការពារ ទាំងមុនពេល អំឡុងពេល និងក្រោយពេលបោះឆ្នោត ធានាឱ្យបរិយាកាសទូទៅប្រព្រឹត្តទៅដោយរលូន សេរី យុត្តិធម៌ និងមានសុវត្ថិភាពកម្រិតខ្ពស់បំផុត។
២. ការពង្រឹងសន្តិសុខ និងសណ្ដាប់ធ្នាប់មូលដ្ឋាន៖ ត្រូវបន្តជំរុញអនុវត្តគោលនយោបាយ «ភូមិ-ឃុំ-សង្កាត់មានសុវត្ថិភាព» ឱ្យកាន់តែមានប្រសិទ្ធភាព ដោយផ្តោតលើការបង្ការ បង្ក្រាបបទល្មើសព្រហ្មទណ្ឌ ល្បែងស៊ីសងខុសច្បាប់ និងជាពិសេសការជួញដូរ ចែកចាយ ប្រើប្រាស់គ្រឿងញៀននៅតាមមូលដ្ឋាន។
៣. ការគ្រប់គ្រងព្រំដែន និងច្រកទ្វារ៖ កងកម្លាំងវរសេនាតូចការពារព្រំដែនគោកលេខ៦០៣ និងប៉ុស្តិ៍ច្រកទ្វារទ្វេភាគី ត្រូវបង្កើនការយាមកាម ល្បាតត្រួតពិនិត្យ ដើម្បីទប់ស្កាត់ការឆ្លងដែនខុសច្បាប់ ការរត់ពន្ធទំនិញគេចពន្ធ និងបទល្មើសឆ្លងដែនគ្រប់ប្រភេទ។
៤. ការផ្តល់សេវាសាធារណៈ និងវិន័យកងកម្លាំង៖ នគរបាលប៉ុស្តិ៍រដ្ឋបាលឃុំ-សង្កាត់ ត្រូវយកចិត្តទុកដាក់បម្រើសេវាជូនប្រជាពលរដ្ឋឱ្យបានឆាប់រហ័ស មានតម្លាភាព (ដូចជាការងារអត្តសញ្ញាណប័ណ្ណ សៀវភៅស្នាក់នៅ និងសៀវភៅគ្រួសារ) ព្រមទាំងប្រកាន់ខ្ជាប់នូវវិន័យ សីលធម៌វិជ្ជាជីវៈ និងឥរិយាបថទន់ភ្លន់តែម៉ឺងម៉ាត់ ដើម្បីបង្កើនជំនឿទុកចិត្តពីប្រជាពលរដ្ឋ៕
ប្រភព៖ ស្នងការដ្ឋាននគរបាលខេត្តតាកែវ
0 Comment:
Post a Comment